रानीपोखरीको बेहाल, ९ महिनाको काममा ३ वर्षसम्म अलमल

२ माघ, काठमाडौं । रानीपोखरीको पुनर्निर्माणको राष्ट्रपति विद्यादेवी भण्डारीबाट शिलान्यास भएको बुधबार ३ वर्ष बित्यो । २०७३ को तिहारका लागि खुला गर्ने भन्दै शिलान्यास भएको रानीपोखरी अहिले जीर्ण, जर्जर र कुरुप अवस्थामा छ ।

रानीपोखरी पुनर्निर्माणको जिम्मा काठमाडौं महानगरको हातमा छ । तर, ९ महिनामा बनाइसक्ने भनेर काम सुरु भएको रानीपोखरी पुनर्निर्माणमा महानगरपालिकाले हेत्रलचेक्र्याइँ र ढिलासुस्ती गर्‍यो ।

यो तीन वर्ष रानीपोखरी विवादमै रुमल्लियो । रानीपोखरीको बालगोपालेश्वर मन्दिर पुनर्निर्माणमा ०७३ सालमा काठमाडौं महानगरपालिकाले छडसहित कंक्रिट प्रयोग गर्‍यो । सम्पदाविद र युनेस्कोको आपत्तिपछि काम रोकेर पुरातत्व विभागले नै मन्दिरको जिम्मा लियो ।

महानगरपालिकाले पोखरीमा फेरि कंक्रिट प्रयोग गर्‍यो । पोखरीमा पानी अड्याउन भन्दै कंक्रिटकै पर्खाल लगाइयो । यसबाट उत्पन्न लामो विवाद रानीपोखरीलाई प्राचीन मल्लकालीन शैलीमै निर्माण गर्ने सहमतिका साथ भर्खरै सल्टिएको छ ।

बल्ल विज्ञ समूहको अध्ययनका आधारमा रानीपोखरीबीचको बालगोपालेश्वर मन्दिरको पुनर्निर्माण ग्रन्थकुट शैलीमा निर्माण गर्ने सहमति भएको छ ।